جوزى وزنه

انجي_الخطيب

أنا كنت مستني أتجوزك الأول… عشان أقدر أقولك الحقيقة! فضلت واقفة مكاني، والورق بيترعش بين إيديا، وعيني بتتنقل بين المستندات والصور، وأنا مش قادرة أستوعب اللي قدامي. كان فيه عقد بيع، وتوكيل رسمي، وصورة لبيت قديم، وكشف حساب بنكي، وفي آخر الورق صورة ست كبيرة في السن، واقفة قدام مستشفى، وحاضنة طفل صغير. رفعت عيني لمحمود، وقلت بصوت مخنوق إنت كنت بتخطط لإيه من ورايا؟! محمود حاول يتحرك ناحيتي، لكنه وقف لما شافني برجع لورا. قال بهدوء منى، اقعدي واسمعيني، والله العظيم أنا مش عايز أظلمك ولا أوجعك. ضحكت وسط دموعي وقلت بعد إيه؟! بعد ما اتجوزتني وخليتني أقف قدام الناس كلها وأدافع عن اختيارك؟ بعد ما خليتني أواجه أهلي ونظراتهم وكلامهم؟ إنت كنت بتضحك عليّا طول الوقت؟ حماتي، اللي اسمها نوال، وضعت إيديها على الترابيزة وقالت أيوه! كان بيضحك عليكي! وأنا من أول يوم وأنا بحذره منك، لكنه كان مصمم يكمل في لعبته! محمود لف ناحيتها وقال بغضب كفاية يا أمي! إنتِ مش هتتكلمي عن حاجة إنتِ متعرفيش عنها نص الحقيقة! ردت عليه وهي بتضحك بسخرية أنا معرفش؟! أنا أمك يا محمود! أنا اللي ربيتك وعارفة إنت بتفكر في إيه! بصيت للورق تاني، ووقفت عند مستند عليه اسم والدي. اتجمدت. اسم والدي كان مكتوب في عقد قديم، وتحت اسمه توقيع أعرفه كويس. أبويا! حسيت بدوخة شديدة، ومسكت طرف الترابيزة عشان ما أقعش. إيه علاقة أبويا بالموضوع ده؟! محمود غمض عينيه للحظة، وكأنه كان مستني السؤال ده من أول ما دخلنا القاعة. وبصلي وقال أبوكِ كان صاحب فضل كبير عليّا وعلى عيلتي، وأنا بدور على طريقة أردله الجميل من سنين. رفعت صوتي فيه فضل إيه؟! وإيه اللي يخليك تتجوزني عشان ترد جميل لأبويا؟! أنا مش هدية يا محمود! أنا بني آدمة وليا مشاعر! هز راسه بسرعة وقال عارف، وعمري ما شوفتك هدية

ولا وسيلة، لكن الموضوع أكبر من كده بكتير. في اللحظة دي، أبويا

قام من مكانه واتقدم ناحيتنا. كان وشه متغير، وعينيه مليانة غضب وصدمة. خطف الورق من إيدي، وفضل يقلب فيه بسرعة، ولما وصل لآخر صفحة، رفع عينيه لمحمود وقال إنت وعدتني إنك مش هتفتح الموضوع ده غير لما تكون جاهز تقوله لمنى بنفسك! أنا بصيت لأبويا بصدمة. بابا؟! إنت كمان عارف؟! أبويا سكت. والسكوت ده كان أقسى من أي إجابة. قربت منه وقلت يعني إنتوا الاتنين كنتوا عارفين؟! كل الناس دي كانت بتتفرج عليّا وأنا آخر واحدة تعرف الحقيقة؟! أبويا حاول يمسك إيدي، لكني سحبتها. يا بنتي، اسمعيني… قاطعته وأنا بعيط متقوليش يا بنتي! إنت المفروض أكتر واحد كان يحافظ عليّا! إزاي تسمح إن بنتك تدخل جوازة وهي مش عارفة حقيقتها؟! محمود نزل راسه وقال الغلطة غلطتي أنا يا منى، متلوميش والدك. بصيتله وقلت وأنا ألوم مين؟! إنت ولا أبويا ولا الست اللي واقفة بتفضحني في ليلة فرحي؟! حماتي قربت مننا وقالت أنا هقولك الحقيقة اللي محدش فيهم عنده الشجاعة يقولها! محمود اتجوزك عشان أبوكي كان عنده سر قديم، والسر ده متعلق بفلوس وعقارات وورث كبير! محمود رفع صوته أمي! لكنها كملت من غير ما تبصله أبوكِ كان شريك أبو محمود في أرض كبيرة، والأرض دي اتباعت من سنين، وفي فلوس اختفت، وابني اتظلم بسبب الموضوع ده. دلوقتي محمود عايز يرجع حقه، ومش هيعرف يعمل كده غير لما يبقى جوزك! حسيت إن قلبي وقع في رجليا. بصيت لمحمود، وقلت هو ده السبب؟! اتجوزتني عشان فلوس؟! هز راسه بقوة لا، الكلام ده مش حقيقي. قلتله طب الورق ده بيقول إيه؟! رد بيقول إن فيه أرض اتسجلت باسمك من أكتر من عشرين سنة، وإن الأرض دي ليكي حق فيها، وأنا كنت بحاول أوصلك الحقيقة قبل ما حد يقدر يستولي عليها. ضحكت بمرارة يعني أنا بقيت صاحبة أرض ومش عارفة؟! أبويا أخد نفس طويل وقال الأرض دي كانت ملك جدك من ناحية أمك، وكان فيه نزاع عليها من سنين طويلة. جدك كتب جزء منها باسمك وإنتِ لسه طفلة، وأنا احتفظت بالأوراق لحد ما تكبري، لكن حصلت مشاكل، وأوراق كتير اختفت. بصيتله باستغراب وليه مخبي عني كل ده؟ قال بحزن كنت قلقان عليكي من الطمع ومن الناس اللي ممكن تقرب منك عشان الفلوس. نوال ضحكت بصوت عالي يا سلام! بقى كل ده عشان قلقين عليها؟! طب قولوا بقى إن محمود دخل الجوازة دي عشان يقدر يتحكم في الأرض بعد ما بقى زوجها! محمود بص لأمه بنظرة حادة وقال إنتِ عارفة كويس إن الأرض دي مش ليا، وإن منى مالكة فيها بحكم القانون، وإن أنا موقعتش على ورقة واحدة تخلي ليا حق فيها. نوال ردت بسرعة بس كنت ناوي! سكت محمود للحظة. واللحظة دي كانت كفاية إنها تخليني أبصله بقلق. كنت ناوي إيه يا محمود؟ قرب مني وقال كنت ناوي أطلب منك تساعديني نرجع الأرض لأصحابها الحقيقيين، لأن فيه ناس استولت عليها من سنين، ومن ضمنهم شريك قديم لوالدك. قلتله طب وليه الجواز؟! سكت. وبعدين قال بصوت واطي عشان الراجل ده كان بيراقب كل تحركاتي، وكان عنده استعداد يضرني أو يضر أي حد يقرب مني. وأنا كنت عايز أبعدك عن الخطر لحد ما أقدر أتصرف. حسيت إن الكلام بيتعقد أكتر. يعني إنت اتجوزتني عشان تحميني؟ ولا عشان تحمي نفسك؟ محمود بص في عيني وقال في الأول كان عندي سبب واحد، وبعد ما عرفتك بقي عندي ألف سبب أحرص عليكي. لكن الكلام جه متأخر. متأخر أوي. خلعت الدبلة من إيدي وحطيتها على الترابيزة. قلتله أنا مش قادرة أعيش مع حد مش عارفة هو بيحبني ولا بيستخدم مشاعري عشان يوصل لحاجة. الليلة دي انتهت بالنسبة لي. حاول يقوم، لكنه تعب من الحركة، فمد إيده ناحية الكرسي يستند عليه. للحظة شفت التعب الحقيقي في وشه. لكن وجعي كان أكبر من إني أقدر أفكر في أي حاجة تانية. أبويا قرب مني وقال تعالي معايا يا منى. خرجت من القاعة وأنا بسمع همسات الناس ورايا. واحدة بتقول يا حرام، شكلها اتضحك عليها. والتانية بترد أصل الجوازة من الأول كانت غريبة. لكن المرة دي ما اهتمتش بنظرات حد. كنت حاسة إن فستان الفرح تقيل على جسمي، وإن كل خطوة باخدها بتبعدني عن حياة كنت متخيلاها. ركبت عربية أبويا، وفضلت طول الطريق ساكتة. أول ما وصلنا البيت، دخلت أوضتي وقفلت الباب. أمي جريت عليّا، ولما شافت وشي حضنتني وفضلت تعيط. حقك عليّا يا حبيبتي، أنا كان نفسي أفرح بيكي، بس مكنتش عايزة أشوفك مكسورة. سألتها وأنا بمسح دموعي إنتِ كنتِ عارفة؟ هزت راسها وقالت لا والله، أبوكي عمره ما حكالي حاجة عن الأرض دي. قعدت على السرير وفضلت أبص لفستاني الأبيض. كان المفروض أكون أسعد واحدة في الدنيا. لكن بقيت واحدة حاسة إنها اتسرقت منها فرحتها قبل ما تبدأ. في نفس الليلة، تليفوني رن. كان محمود. رفضت المكالمة. رن تاني. رفضت. وبعدين وصلتني رسالة منه مش هطلب منك ترجعيلي، ومش هضغط عليكي تسمعيني. بس أوعديني إنك متوقعيش على أي ورقة تخص الأرض قبل ما محامي مستقل يراجعها. فيه ناس مستنية اللحظة دي، وأنا قلقان عليكي منهم. قريت الرسالة كذا مرة. وبعدين قفلت الموبايل. كنت محتاجة أبعد عن كل حاجة. لكن اللي مكنتش أعرفه إن اللي حصل في الفرح كان مجرد بداية. تاني يوم الصبح، صحيت على صوت خبط عنيف على باب البيت. أبويا فتح، وسمعت صوت راجل غريب بيقول إحنا جايين بخصوص مدام منى، ولازم نقابلها حالًا. خرجت من أوضتي، ولقيت راجلين لابسين بدل، ومعاهم واحد ماسك ملف أسود. أبويا سألهم خير؟ مين حضراتكم؟ الراجل طلع كارنيه وقال إحنا من مكتب المحامي اللي ماسك قضية أرض عيلة الشافعي، وفيه تطور خطير حصل امبارح بالليل. قلبي بدأ يدق بسرعة. تطور إيه؟ الراجل بصلي وقال فيه حد قدم طلب مستعجل لنقل ملكية الأرض، وقدم معاه توكيل منسوب لحضرتك. حسيت إن الدنيا بتلف بيا. توكيل؟! أنا ممضيتش أي توكيل! فتح الملف وطلع صورة ورقة. كان عليها اسمي وتوقيع شبه توقيعي. لكن أنا متأكدة إني ممضيتش عليها. أبويا اتعصب وقال مين اللي قدم الورقة دي؟ الراجل رد شركة اسمها النور للاستثمار العقاري، وممثلها القانوني الأستاذ فؤاد البدري. أبويا اتجمد. ولأول مرة أشوف القلق الحقيقي في عينيه. فؤاد البدري؟! سألته تعرفه يا بابا؟ قعد على أقرب كرسي وقال ده الشريك القديم لجدك، والراجل اللي كان سبب ضياع الأرض من سنين. حسيت إننا دخلنا في دوامة ملهاش نهاية. المحامي كمل فيه حاجة تانية. الطلب اتقدم بمستندات فيها توقيع والد حضرتك، وده معناه إن فيه حد بيحاول يثبت إن الأرض اتباعت من زمان. بصيت لأبويا. بابا، إنت مضيت على حاجة؟ هز راسه بسرعة مستحيل. أنا عمري ما بعت حقك. في

2

جوزى وزنه لانجى الخطيب