جوزى وزنه لانجى الخطيب
جوزي ووزنه 280 كيلو… ورغم اعتراض أهلي علية ونظرات الناس اللي كلها ذهول في ليلة فرحنا، حماتي وقفت فجأة قدام كل الناس ورفعت صوتها بصوت هزّ القاعة كلها ابني متجوزكيش علشان بيحبك… ده اتجوزك لسبب تاني خالص، ولو عرفتي الحقيقة هتكرهي اليوم اللي وافقتي فيه عليه!
أنا عندي 27 سنة، وجوزي اسمه محمود، وعنده 38 سنة، ووزنه بيقرب من 280 كيلو.
من أول يوم عرّفت فيه أهلي على محمود، وأنا شايفة الصدمة في عيونهم، وكأنهم مش قادرين يستوعبوا إزاي بنت في سني وجمالي تختار تتجوز راجل بالحجم ده.
أمي كانت أكتر واحدة رافضة الجوازة، وفي يوم دخلت عليّا أوضتي، وقعدت جنبي، ومسكت إيدي وقالتلي والدموع مالية عينيها
يا بنتي، إنتِ لسه صغيرة وجميلة، وقدامك مستقبل وحياة طويلة… إزاي تقبلي تتجوزي راجل بالشكل ده؟ إنتِ متأكدة إنك مش بتضيعي عمرك بإيدك؟
بصيتلها وابتسمت، رغم إن كلامها وجعني، ورديت عليها بثقة
يا ماما، أنا مش بتجوز شكله ولا وزنه، أنا بحب محمود، واللي بيني وبينه أهم من أي حاجة الناس شايفاها.
كنت مقتنعة بكلامي، أو يمكن كنت بحاول أقنع نفسي إن الحب لوحده كفاية عشان يعدّي أي اختلاف.
كنت بشوف في محمود حاجات محدش غيري بيشوفها، حنيته واهتمامه بيا وطريقته في احتوائي، وكنت فاكرة إن اختياري ليه هو القرار الصح مهما كان رأي الناس.
ورغم اعتراض أهلي ونظرات اللي حوالينا، قررت أكمل وأتجوزه.
لحد ما جه اليوم اللي استنيته طول عمري…
يوم فرحي!
القاعة كانت متزينة بالورد الأبيض، والمزيكا شغالة، وأغاني الفرح مالية المكان، وحوالي 150 شخص من العيلتين والأصحاب والجيران قاعدين مستنيين يشوفونا.
كنت لابسة فستان أبيض، وحاسة إني أميرة في ليلة من ألف ليلة وليلة، ومحمود كان قاعد جنبي، ماسك إيدي وبيبتسملي.
كل حاجة كانت ماشية زي ما خططنا، لحد ما خرجنا من قاعة كتب الكتاب بعد ما المأذون كتب كتابنا، وبدأنا نستقبل تهاني المعازيم.
ساعتها بدأت ألاحظ نظرات الناس.
اتنين واقفين بعيد بيضحكوا وهما بيبصولنا، وست كانت بتهمس لصاحبتها، وشاب رفع موبايله وبدأ يصورنا من غير ما يستأذن!
حسيت بالإهانة، لكن تماسكت وفضلت مبتسمة، وشديت على إيد محمود أكتر، وقلت لنفسي إن محدش من دول هيقدر يبوظ فرحتي.
لكن للأسف، كنت لسه معرفش إن اللي مستنيني جوه القاعة هيكون أسوأ بكتير.
بعد ما بدأ الفرح،
والضيوف اتوزعوا على الترابيزات، كنت قاعدة جنب محمود وبحاول أعيش اللحظة بكل تفاصيلها.
وفجأة…
سمعت صوت كرسي بيتزحزح بعنف!
لفيت ورايا، لقيت حماتي، أم محمود، واقفة، وملامحها متغيرة تمامًا، وعينيها مثبتة عليّا.
رفعت صوتها لدرجة إن المزيكا اختفت وسط صوتها العالي
استنوا كلكم! قبل ما الفرح ده يخلص، فيه حقيقة لازم العروسة تعرفها!
الناس سكتت، وأنا بصيتلها باستغراب وسألتها
فيه إيه يا طنط؟ حصل حاجة؟
ضحكت بسخرية، وقالت بصوت أعلى
إنتِ فاكرة نفسك إن ابني بيحبك؟! فاكرة إنه اختارك عشان جمالك ولا عشان شخصيتك؟! فوقي يا بنتي… ابني مش بيحبك أصلًا، هو اتجوزك علشان حاجة واحدة بس!
حسيت إن الأرض اختفت من تحت رجليا.
كل المعازيم بصوا ناحيتي، وواحدة من قرايبي حطت إيدها على بقها من الصدمة.
حاولت أتكلم، لكن صوتي اختفى.
بصيت لمحمود، وكنت مستنية منه يقوم ويدافع عني، أو حتى يقول لأمه إنها تجاوزت حدودها.
لكنه كان قاعد ساكت!
والأغرب من سكوته إن ملامحه مفيهاش أي اندهاش، بالعكس، كان هادي بشكل خلاني أقلق أكتر.
رفع عينيه لأمه وقال بلهجة حاسمة
يا ماما، أنا طلبت منك متقوليش أي حاجة لحد بكرة!
اتجمدت مكاني!
بصيتله وأنا مش مصدقة اللي سمعته، وسألته بصوت مرتعش
بكرة إيه يا محمود؟! إنت بتتكلم عن إيه؟! وإيه الحاجة اللي إنت محتاجني علشانها؟!
مد إيده ناحيتي، لكني رجعت لورا وقلتله
متلمسنيش… أنا عايزة أفهم! إنت مخبي عني إيه من أول يوم؟!
محمود أخد نفس طويل، وبصلي بنظرة غريبة، وبعدها قال
يا منى، أنا عارف إن اللي هقولهولك هيغير كل حاجة… بس لازم تسمعيني للآخر. أنا اتجوزتك لسبب، وعمري ما كنت متخيل إن اللحظة دي هتيجي بالطريقة دي.
رفعت حماتي صوتها من مكانها
كفاية تمثيل يا محمود! البنت دي لازم تعرف الحقيقة قبل ما تضيع حياتها معاك!
وبسرعة فتحت شنطتها وطلعت ظرف كبير وسميك.
رفعته قدام الموجودين وقالت بغضب
أنا تعبت من السكوت! بكرة هيكون فات الأوان، وساعتها مش هينفعها الندم!
وبعدين قربت من الترابيزة ورمت الظرف قدامي.
بصيت للظرف، وبعدين بصيت لمحمود، وسألته
إيه اللي جواه؟ وليه أمك بتقول إن بكرة هيكون فات الأوان؟!
محمود نزل عينيه للأرض، وسكوته كان كأنه اعتراف بحاجة أكبر من قدرتي على الاستيعاب.
مديت إيدي المرتعشة وفتحت الظرف.
كان جواه مجموعة أوراق، وصور، ومستندات رسمية.
لكن
أول ما عيني وقعت على أول ورقة، حسيت إن قوتي اتسحبت من عروقي، وإني مش قادرة آخد نفسي!
رفعت عيني ببطء ناحية محمود، وقلت بصوت مبحوح
إيه ده يا محمود؟! إنت كنت عارف إن ده موجود؟!
رد عليّا بجملة واحدة خلتني أقوم من مكاني وأرجع لورا وأنا بعيط
أنا كنت مستني أتجوزك الأول… عشان أقدر أقولك الحقيقة!
وفي اللحظة دي فهمت إن جوازي من محمود مكانش زي ما تخيلت أبدًا، وإن السر اللي مخبيه عني ممكن يغير حياتي للأبد!
